வறுமையும் விழாக் காலத் தனிமையும்

விழா நாள்கள் பலருக்கும் மகிழ்ச்சியைக் கூட்டும் நாள்கள். குடும்ப உறுப்பினர்கள் பலரும் ஒன்றுகூடும் நாள்கள். ஆனால் கோடிக்கணக்கான மக்களுக்கு, இதே விழாக் காலங்கள் தனிமையின் கொடூரமான நினைவூட்டல்களாக, சமூகப் புறக்கணிப்பின் வேதனையான அனுபவங்களாக மாறுகின்றன. வறுமை என்பது வெறும் பொருளாதாரப் பற்றாக்குறை மட்டுமல்ல.. அது மனித உறவுகளையும், சமூக இணைப்புகளையும், உளவியல் நலத்தையும் சிதைக்கும் ஒரு சமூகவியல் நிகழ்வு.

Oxford பல்கலைக்கழகத்தின் மானுடவியல் மற்றும் அருங்காட்சியக எதனாகிராபி பள்ளி (School of Anthropology and Museum Ethnography) நடத்திய சமீபத்திய ஆய்வு, வறுமையும் தனிமையும் எவ்வாறு ஒன்றோடொன்று பின்னிப் பிணைந்து மனிதர்களின் ஆரோக்கியத்தைக் கடுமையாகப் பாதிக்கின்றன என்பதை வெளிச்சம் போட்டுக் காட்டுகிறது.

20 ஐரோப்பிய நாடுகளில் 24,000க்கும் மேற்பட்ட மக்களிடம் நடத்தப்பட்ட சர்வேயின் முடிவுகள் அதிர்ச்சி அளிக்கின்றன: மிகக் குறைந்த வருமானக் குழுவில் உள்ளவர்களில் 49% பேர் விழாக் காலங்களில் தனிமை உணர்வை அனுபவித்துள்ளனர், அதேசமயம் அதிக வருமானக் குழுவில் இந்த எண்ணிக்கை வெறும் 15% மட்டுமே. இன்னும் வேதனையான உண்மை என்னவெனில், இரு குழுவினரும் குடும்பம், நண்பர்கள், சக பணியாளர்களுடன் சமமான அளவு சமூக உறவுகளைப் பேணுகின்றனர், ஆனால் வறுமையில் வாழ்பவர்கள் அதிகத் தனிமையை உணர்கின்றனர்.

வறுமையும் தனிமையும் இணைந்து உள்ளவர்கள் வலி, களைப்பு, மனச்சோர்வு போன்ற அறிகுறிகளை அதிகம் அனுபவிக்கின்றனர். ஆராய்ச்சியாளர்கள் இதை “தற்காப்பு அறிகுறித் தொகுப்பு” (defensive symptom cluster) என்று அழைக்கின்றனர். குறைந்த வருமான குழுவில், தனிமையை உணரும் நபர்கள் தனிமையில்லாத அவர்களின் சகாக்களில் 73% பேரை விட அதிக அறிகுறி மதிப்பெண்களைக் கொண்டிருந்தனர்.

முனவர் டேவிஸ் தலைமையில் நடத்தப்பட்ட இந்த ஆய்வு, பரிணாம உயிரியல் கண்ணோட்டத்தில் மனிதர்கள் வளங்களையும் பாதுகாப்பையும் பெற வலுவான சமூகப் பிணைப்புகளை நம்பியிருக்கின்றனர் என விளக்குகிறது. சமூக ஒதுக்கீடு அல்லது தனிமையை உணரும்போது, உடல் தற்காப்பு வழிகளில் செயல்படுகிறது, வலி இயக்கத்தை கட்டுப்படுத்துகிறது, மனச்சோர்வு உடனே ஆற்றல் சேமிப்பை ஊக்குவிக்கின்றது.

தற்போது உலகளவில் 69 கோடி மக்கள் தீவிர வறுமையில் (நாள் ஒன்றுக்கு $2.15க்கும் குறைவான வருமானம்) வாழ்கின்றனர், கிட்டத்தட்ட உலகில் பாதிக்கும் மேலான மக்கள் நாள் ஒன்றுக்கு $6.85க்கும் குறைவாக வாழ்கின்றனர். இது வெறும் புள்ளிவிவரம் மட்டுமல்ல.. இவை மனித முகங்களை, கனவுகளை, துயரங்களைக் கொண்ட உயிர்கள்.

வறுமை என்பது பன்முக நிகழ்வு—வருமானப் பற்றாக்குறை மட்டுமல்ல, கண்ணியத்துடன் வாழத் தேவையான அடிப்படைத் திறன்களின் பற்றாக்குறையும் கூட. வறுமையில் வாழும் மக்கள் ஊட்டச்சத்து குறைபாடு, மின்சாரம் மற்றும் பாதுகாப்பான குடிநீர் போன்ற அடிப்படைச் சேவைகள் இல்லாமை, கல்வி மற்றும் சுகாதாரத்திற்கான குறைந்த அணுகல் ஆகியவற்றால் பாதிக்கப்படுகின்றனர்.

தமிழில் ஒரு பழமொழி உண்டு: “பண்டிகை நாளில் தனியாக இருப்பது இரட்டை வேதனை.” இதை நானும் என் குடும்பமும் நேரடியாக அனுபவித்திருக்கிறோம். என் அக்கா கல்லூரியில் படிக்கும் காலத்தில், ஒரு முறை பண்டிகை விடுமுறையின்போது வீட்டுக்குச் செல்ல போக்குவரத்துச் செலவு இல்லாததால் விடுதியிலேயே தங்கியிருந்தார். விடுதி உணவகங்கள் மூடப்பட்டிருக்கும், சகமாணவர்கள் அனைவரும் வீடு சென்றிருப்பார்கள். உணவு இல்லாமல், தனியாக, விழாவின் மகிழ்ச்சி நிறைந்த நாட்களில் வெற்று விடுதியில் காத்திருப்பதின் வேதனை எவ்வளவு என்பதை வார்த்தைகளால் விவரிக்க முடியாது.

இங்கிலாந்தில் நடத்தப்பட்ட ஆய்வில், பள்ளி விடுமுறைக் காலங்களில் குறைந்த வருமான குடும்பங்களைச் சேர்ந்த பெற்றோர்கள் தங்கள் குழந்தைகள் சாப்பிட தாங்கள் உணவைத் தவிர்த்துள்ளனர் என்று மூன்றில் ஒரு பங்கினர் கூறியுள்ளனர். 78% பெற்றோர்கள் தங்கள் குழந்தைகளை பொழுதுபோக்கிற்கு வெளியே அழைத்துச் செல்ல முடியாத காரணத்தால் தனிமையை உணர்கின்றனர்.

பணப் பற்றாக்குறை காரணமாக, பல குழந்தைகள் கடற்கரை அல்லது மிருகக்காட்சிச்சாலைக்கு செல்வது போன்ற எளிய கோடை மகிழ்ச்சிகளை இழக்கின்றனர். நண்பர்கள் வெளியே மகிழ்ச்சியாக விளையாடும்போது, குறைந்த வருமான குடும்பங்களைச் சேர்ந்த குழந்தைகள் நெருக்கமான அல்லது பாதுகாப்பற்ற வீடுகளில் நீண்ட மற்றும் தனிமையான நாட்களைக் கழிக்கின்றனர்.

Migration Policy Institute நடத்திய 2020 ஆய்வின்படி, விடுமுறைக் காலங்களில் 30% புலம்பெயர்ந்தோர் மிக அதிகமான அளவில் தனிமை உணர்வை அனுபவிக்கின்றனர். சர்வதேச மாணவர்களுக்கு, கிறிஸ்துமஸ் பருவம் மிகவும் பிஸியான மற்றும் விலையுயர்ந்த பயண காலமாகும். விசா கட்டுப்பாடுகள் பயணச் செயல்முறையை மேலும் சிக்கலாக்குகின்றன.

Center for Collegiate Mental Health ஆய்வு கவலைக்குரிய போக்கைக் காட்டுகிறது: 2021-22 கல்வியாண்டில் 12.6% சர்வதேச மாணவர்கள் சமூகத் தனிமைக்காக ஆலோசனை பெற்றனர், உள்நாட்டு மாணவர்களில் இது வெறும் 8.1% மட்டுமே. ஆஸ்திரேலியாவில் நடத்தப்பட்ட கருத்துக் கணிப்பில், கடந்த 12 மாதங்களில் 77% சர்வதேச மாணவர்கள் தனிமையை உணர்ந்ததாக அறிவித்துள்ளனர்.

ஆஸ்திரேலியாவில் 200 சர்வதேச மாணவர்களிடம் நடத்தப்பட்ட ஆழமான நேர்காணல்களில், மூன்றில் இரண்டு பங்கினர் குறிப்பாக ஆரம்ப மாதங்களில் தனிமை மற்றும் தனிமைப்படுத்தல் பிரச்சினைகளை அனுபவித்துள்ளனர்.

சீனாவில், Spring Festival என்பது உலகின் மிகப்பெரிய மனித இடம்பெயர்வு என்று அழைக்கப்படுகிறது. 38.5 கோடி சீன மக்கள் தங்கள் சொந்த ஊர்களுக்குத் திரும்புகின்றனர். ஆனால் பலருக்கு, பயணச் செலவு மற்றும் 21 மணிநேர பயண நேரம் இந்த திரும்பல் சாத்தியமற்றதாக்குகிறது.

இன்றைய உலகமயமாக்கப்பட்ட பொருளாதாரத்தில், கோடிக்கணக்கான தொழிலாளர்கள் சம்பாதிப்பதற்காக தங்கள் சொந்த நாடுகளை விட்டு வெளிநாடுகளில் வேலை செய்கின்றனர். உலகளவில் சர்வதேச புலம்பெயர்ந்தோரின் எண்ணிக்கை 1970ல் 8.4 கோடியிலிருந்து 2019ல் 27.2 கோடியாக அதிகரித்துள்ளது.

அஞ்சல் வருமா என எதிர்பார்த்து காத்திருக்கும் மனைவியின் சோகத்தை நாம் படித்திருப்போம்.

ஐயா அஞ்சல் உண்டோ என்பேன் நான்

கையால் விரித்துரைப்பார்

கண்கலங்கி நான் நின்றிருப்பேன்

எத்தனை நாள் இப்படி நான்

இன்னலுற்றுச் செத்திடுவேன்

மெத்த உனை வேண்டுகிறேன்

மேவி இதைக் கூறிடுவாய்

வாடகை கேட்டு மிக வாட்டுகிறார் வீட்டார்கள்

தேடறிய கல்வி தெரிவிக்கும் பள்ளிக்கு

சம்பளம் வேண்டுமென சாற்றுகிறான் என் பிள்ளை

கம்பளம் விற்றுக் கடன் கழித்தேன்” என வறுமையையும் தனிமையையும் சொல்லும் பாடல்!

விமான டிக்கெட்டுகளின் விலை பல தொழிலாளர்களுக்குத் தடையாக உள்ளது. பண்டிகைக் காலங்களில், டிக்கெட் விலை இன்னும் உயர்கிறது. வருடத்திற்கு ஒரு முறை வீட்டிற்குச் செல்வது கூட பலருக்கு சாத்தியமற்றது.

ஐரோப்பிய தொழிற்சங்க கூட்டமைப்பின் பகுப்பாய்வின்படி, 2022ல் 3.97 கோடி வேலை செய்பவர்கள் (15%) ஒரு வார விடுமுறைக்கு செலவு செய்ய முடியவில்லை—இது 2021ல் 3.76 கோடியிலிருந்து (14%) அதிகரித்துள்ளது.

ஃபிரான்ஸ்  நாட்டில் மட்டும் கிட்டத்தட்ட ஒரு மில்லியனுக்கும் அதிகமாக   உழைக்கும் மக்கள் வீட்டில் தங்குவதற்குக் கட்டாயப்படுத்தப்பட்டனர். இதாலியில் அதிக எண்ணிக்கையிலான தொழிலாளர்கள் (60.74 லட்சம்) விடுமுறை கிடைக்காமல் குடும்பத்தோடு விடுமுறையைக் கொண்டாட முடியவில்லை,

சமூக விலக்கு என்பது சிக்கலான மற்றும் பல பரிமாண செயல்முறைகளைக் கொண்டது. இது வளங்கள், உரிமைகள், பொருட்கள் மற்றும் சேவைகளின் பற்றாக்குறை அல்லது மறுப்பை உள்ளடக்குகிறது, மேலும் சமுதாயத்தின் பெரும்பான்மையினருக்குக் கிடைக்கும் சாதாரண உறவுகள் மற்றும் செயல்பாடுகளில் பங்கேற்க இயலாமையையும் குறிக்கிறது.

விழா நாட்கள், திருமணங்கள், பிறந்தநாள் கொண்டாட்டங்கள் போன்றவற்றில் பங்கேற்க இயலாமை ஒரு சமூக வகை மரணம். இங்கிலாந்தில் 75 லட்சம் மக்கள் திருமணங்களில் கலந்துகொள்வது அல்லது பிறந்தநாட்களில் கொண்டாட்டங்கள் நடத்துவது போன்ற பொதுவான சமூக நடவடிக்கைகளில் பங்கேற்க மிகவும் ஏழைகளாக உள்ளனர்.

வறுமையில் உள்ள குழந்தைகளுக்கு, இது குறிப்பாக வேதனைக்குரியது. 52% பெற்றோர்கள் விடுமுறைக் காலங்களில் பணப் பற்றாக்குறையின் விளைவாக தங்கள் குழந்தைகள் கொடுமைப்படுத்தப்படுவார்கள் என்று கவலைப்படுகின்றனர். இது குழந்தைகளைத் தனிமைப்படுத்துகிறது மற்றும் அவர்களின் மகிழ்ச்சி மற்றும் மன நலனில் உண்மையான தாக்கத்தை ஏற்படுத்துகிறது.

மனிதர்கள் இயல்பாகவே சமூக உயிரினங்கள். நமது மூளையின் பெரும்பகுதி சமூகத் தொடர்புகளைச் செயலாக்குவதற்காக, பரிணாம வளர்ச்சி அடைந்துள்ளது. பெரிய விழாக்கள் மற்றும் பண்டிகைகள் சமூகப் பிணைப்புகளை வலுப்படுத்தும் முக்கிய வழிமுறைகள். இவற்றிலிருந்து விலக்கப்படுவது ஆழமான உளவியல் வலியை ஏற்படுத்துகிறது.

பரிணாம கண்ணோட்டத்தில், மனிதர்கள் வளங்கள் மற்றும் பாதுகாப்பை அணுக வலுவான சமூகப் பிணைப்புகளை நம்பியிருக்கின்றனர். மக்கள் சமூகரீதியாக விலக்கப்பட்டதாக அல்லது தனிமைப்படுத்தப்பட்டதாக உணரும்போது, அவர்களின் உடல்கள் அவர்களைப் பாதுகாக்கும் நோக்கமாக வழிகளில் எதிர்வினை ஆற்றலாம்—எடுத்துக்காட்டாக, இயக்கத்தை கட்டுப்படுத்தும் வலி அல்லது ஆற்றல் சேமிப்பை ஊக்குவிக்கும் மனச்சோர்வு மற்றும் சோர்வு மூலம்.

COVID-19 எல்லை மூடல்களின் போது, சர்வதேச மாணவர்களில் பலர் வீடு திரும்ப முடியாமல் தனிமை, தனிமைப்படுத்தல் மற்றும் மனச்சோர்வு உணர்வுகளை அனுபவித்தனர், இது அவர்களின் தொடர்பு, சமூக வாழ்க்கை, கல்வி வாழ்க்கை மற்றும் உறக்க மற்றும் உணவு வழக்கத்தை குறிப்பிடத்தக்க வகையில் பாதித்தது.

விடுமுறைக் காலங்கள் பாரம்பரியமாக மக்கள் தங்கள் பிஸியான பணி அட்டவணைகளிலிருந்து சிறிது ஓய்வு எடுக்கவும், நண்பர்கள் மற்றும் உறவினர்களுடன் மீண்டும் இணைந்து கொள்ளவும் வாய்ப்புகளை உருவாக்கும் காலங்கள். மேலும் இவை உறவுகளைப் புத்துயிர்ப்பிக்க சமூகம் அனுமதிக்கும் நேரமாகும். விடுமுறைகளுடன் தொடர்புடைய கொண்டாட்டச் சூழல் மக்களை மகிழ்ச்சியை மற்றவர்களுடன் பகிர்ந்து கொள்ள விரும்புகிறது. தனியாகக் கொண்டாடுவது தனிமை மற்றும் சோகத்தின் உணர்வுகளை வலியுறுத்தலாம்.

சர்வதேச மாணவர்கள் மற்றும் புலம்பெயர்ந்தோர் மூன்று வகையான தனிமையை அனுபவிக்கின்றனர்:

அவற்றில் முதன்மையானவை  தனிப்பட்ட தனிமை (Personal Loneliness)

குடும்பங்களுடனான தொடர்பின் இழப்பு. தாய், தந்தை, சகோதரர்கள், சகோதரிகளை அணுக  முடியாமை, அவர்களுடன் திருநாட்களைக் கொண்டாட முடியாமை.

சமூக தனிமை (Social Loneliness): இவ்வகையில் நண்பர்களின் இழப்பு, அவர்களின் தொடர்பு இழை அறுபட்டு விடுதல் ஆகியவை காரணங்களாக அமைகின்றன.

 பண்பாட்டுத் தனிமை (Cultural Loneliness): விருப்பமான பண்பாட்டு மற்றும் மொழி சூழலின் இல்லாமை. அயலகச் சூழலில் நமது பண்பாட்டைப் பின்பற்றும் சூழல் இல்லாமையால் ஏற்படும். இது போதுமான தனிப்பட்ட மற்றும் சமூக ஆதரவு உள்ள மாணவர்களையும் பாதிக்கும்.

வறுமை மற்றும் விழாக் காலத் தனிமை என்பது ஓர் உலகளாவிய சவால். வறுமை என்பது மனித உரிமை மீறல் என்று ஐக்கிய நாடுகள் சபை வலியுறுத்துகிறது. இது:

1. பொருளாதாரப் பிரச்சினையை விட அதிகம்: வறுமை என்பது வருமானப் பற்றாக்குறை மட்டுமல்ல, கண்ணியத்துடன் வாழத் தேவையான அடிப்படை திறன்களின் பற்றாக்குறையும் உள்ளடக்கிய பன்முக நிகழ்வு.
2. உடல்நல பாதிப்பு: முந்தைய ஆராய்ச்சி தனிமை புகைபிடிப்பதைப் போலவே தீங்கு விளைவிக்கும் என்று கூறுகிறது.
3. தலைமுறை விளைவுகள்: வறுமையும் சமூக விலக்கும் தலைமுறைகள் வழியாக நீடிக்கும், குழந்தைகளின் கல்வி மற்றும் எதிர்கால வாய்ப்புகளைப் பாதிக்கும்.
4. மனநலப் பிரச்சினைகள்: புலம்பெயர் தொழிலாளர்களிடையே மனச்சோர்வு பரவல் 38.98% மற்றும் பதட்டம் 27.31%—இது பொதுவான மக்கள்தொகையை விட மிகவும் அதிகம்.

என் அக்காவின் அனுபவம் இன்று உலகம் முழுவதும் லட்சக்கணக்கான மக்கள் அனுபவிப்பதன் சிறிய பிரதிபலிப்பு மட்டுமே. கல்லூரி விடுதியில் அந்த வார பண்டிகை விடுமுறையின்போது, வெற்று தாழ்வாரங்களில், மூடிய உணவகங்களுக்கு முன், மற்றவர்கள் குடும்பத்துடன் கொண்டாடும் சத்தங்களைக் கற்பனையில் கேட்டபடி தனியாக இருந்தது என்னவென்று நினைத்துப் பாருங்கள்.

இன்று வெளிநாடுகளில் வேலை செய்யும் இலட்சக்கணக்கான மாணவர்களுக்கு இதே நிலைமை.

பண்டிகைக் காலங்களில் தனிமையில் உள்ளவர்களைத் தேடுங்கள்: உங்கள் சமூகத்தில், பணியிடத்தில், அயலில் யார் தனியாக இருக்கலாம் என்பதைக் கவனியுங்கள். தனி நபர் அல்லது குடும்ப அளவில்,

1. அழைப்புகளை விரிவுபடுத்துங்கள்: உங்கள் குடும்பக் கொண்டாட்டங்களுக்கு வெளிநாட்டு மாணவர்கள், புலம்பெயர் தொழிலாளர்கள், தனிமையில் உள்ளவர்களை அழையுங்கள்.
2. உணவுப் பகிர்வு: விழாக்களின்போது உணவைப் பகிர்வது ஒரு எளிய ஆனால் சக்திவாய்ந்த செயல்.

அதே நிறுவன மட்டத்தில் தனிமையைப் போக்க கீழ்க்காணும் வழிமுறைகளைப் பின்பற்றலாம்.

1. பல்கலைக்கழகங்கள்: சர்வதேச மாணவர்களுக்கு உள்ளூர் புரவலன் குடும்ப நிகழ்ச்சிகளை ஏற்பாடு செய்தல், விடுமுறை காலங்களில் ஆதரவு சேவைகளை வழங்குதல்.
2. முதலாளிகள்: விடுமுறைக் காலச் சலுகைகள், பயணப் பொறுப்புகள் மானியம், நெகிழ்வான பணி நேரங்கள்.
3. சமூக அமைப்புகள்: சமூக விடுமுறை மையங்கள், குழந்தைகளுக்கு இலவச உணவு மற்றும் செயல்பாடுகள்.

கொள்கை மட்டத்தில்:

1. குறைந்தபட்ச ஊதிய உயர்வு: கூட்டு பேரம் பேசுதல் உரிமைகள் வலுப்படுத்துதல், இது நியாயமான சம்பளம் மட்டுமல்லாமல், ஆண்டுக்கு இரண்டு வாரங்கள் வரை கூடுதல் விடுமுறை வழங்குகிறது.
2. போக்குவரத்து மானியங்கள்: பண்டிகை காலங்களில் மாணவர்கள் மற்றும் குறைந்த வருமானம் உடையவர்களுக்கு பயணச் சலுகைகள்.
3. சமூக உள்ளடக்க திட்டங்கள்: வறுமை மற்றும் சமூக விலக்கைக் குறைக்க, பொதுவான விளையாட்டு மைதானங்கள், உடற்பயிற்சி கூடங்கள், நீச்சல் குளங்களுக்கு இலவச அணுகல்.

அறிவ்யல் பத்திரிகையான ஸைன்ஸில் (Science) வெளியிடப்பட்ட ஒரு முக்கியமான ஆய்வு, வறுமைக்கும் மனநலத்திற்கும் இடையே இரு திசை காரண உறவு இருப்பதைக் காட்டுகிறது. வறுமை மனநலப் பிரச்சினைகளை ஏற்படுத்துகிறது, மற்றும் மனநலப் பிரச்சினைகள் வறுமையை அதிகரிக்கின்றன—இது ஒரு தீய சுழற்சி.

ஆய்வின் முக்கிய கண்டுபிடிப்புகள் அதிர்ச்சியளிக்கின்றன: ஒரு குறிப்பிட்ட இடத்தில், மிகக் குறைந்த வருமானம் உள்ளவர்கள் பணக்காரர்களை விட 1.5 முதல் 3 மடங்கு அதிகமாக மனச்சோர்வு அல்லது பதட்டத்தை அனுபவிக்க வாய்ப்புள்ளது. இது “செல்வத்தின் நோய்கள்” என்ற தவறான கருத்தை முற்றிலும் மறுக்கிறது.

விடுமுறைக் காலங்களில் மனநல பாதிப்பு

National Alliance on Mental Illness (NAMI) இன்படி, மனநல நிலைமைகள் உள்ள 64% மக்கள் விடுமுறைக் காலங்களில் தங்கள் அறிகுறிகள் மோசமடைவதாகத் தெரிவிக்கின்றனர். வறுமையில் வாழ்பவர்களுக்கு, இந்தச் சவால் இன்னும் கடுமையானது.

விடுமுறைகள் பாரம்பரியமாக பரிசுகள், கொண்டாட்ட உணவுகள், பயணம் ஆகியவற்றுடன் தொடர்புடையவை. ஆனால் வறுமையில் வாழ்பவர்களுக்கு, இந்த எதிர்பார்ப்புகள் கடுமையான மன அழுத்தத்தை உருவாக்குகின்றன. பரிசுகள் வாங்க முடியாமை, கொண்டாட்ட உணவைச் சமைக்க முடியாமை, குடும்ப நிகழ்ச்சிகளுக்குப் பயணிக்க முடியாமை—இவை அனைத்தும் போதாமை உணர்வையும் அதிகரித்த மன அழுத்தத்தையும் ஏற்படுத்துகின்றன.

தொற்றுநோய்க் காலத்தில் அமெரிக்காவில் 2,714 குறைந்த வருமான பங்கேற்பாளர்களிடையே நடத்தப்பட்ட ஆய்வு, உணவுப் பாதுகாப்பின்மை பதட்டத்தையும், அதிகரித்தது என்று கண்டறிந்தது. குழந்தைகளைக் கொண்ட பதிலளிப்பாளர்கள் மிகவும் பாதிக்கப்படக்கூடிய துணைக்குழுவாக அடையாளம் காணப்பட்டனர்.

விடுமுறைக் காலங்களில், பள்ளி உணவகங்கள் மூடப்படும்போது, பல குழந்தைகள் தங்கள் ஒரே நம்பகமான உணவு மூலத்தை இழக்கின்றனர்.

வறுமை என்பது வெறும் பணப் பற்றாக்குறை மட்டுமல்ல—இது சமூக நடவடிக்கைகளில் பங்கேற்பதிலிருந்து தடுக்கப்படுவதும் கூட. திருமணங்கள், பிறந்தநாள் விழாக்கள், மத நிகழ்வுகள்—இவை அனைத்தும் செலவுகளை உள்ளடக்கியவை. பரிசுகள், புதிய உடைகள், பயணம், உணவுப் பங்களிப்பு—இவற்றை வாங்க முடியாதபோது, மக்கள் வெளியே நிற்கின்றனர்.

இலண்டனில்  நடத்தப்பட்ட வறுமை மற்றும் சமூக விலக்கிற்கான ஆய்வு, சமூக நடவடிக்கைகளில் பங்கேற்க இயலாமை என்பது வறுமையின் முக்கிய அறிகுறியாக காட்டியிருக்கிறது. “சிறப்புச் சந்தர்ப்பங்களில் கொண்டாட்டங்கள்” மற்றும் “ஒரு பொழுதுபோக்கு அல்லது ஓய்வு நேர செயல்பாடு” ஆகியவை அத்தியாவசியங்களாகப் பார்க்கப்படுகின்றன—அவை இல்லாமல், மக்கள் முழுமையாக சமூகத்தில் பங்கேற்க முடியாது.

வறுமையில் வாழ்பவர்கள் பெரும்பாலும் குறைந்த வருமான சுற்றுப்புறங்களில் குடியேறுகின்றனர், அங்கு விழாக்கால நிகழ்வுகள் குறைவாக உள்ளன. பொது இடங்கள் குறைவு, போக்குவரத்து வசதிகள் மோசம், சமூக நிகழ்ச்சிகள் இல்லாமை—இவை அனைத்தும் தனிமையை அதிகரிக்கின்றன.

குறைந்த வருமானம் உடையவர்கள் பெரும்பாலும் குரல் கொடுக்க முடியாதவர்களாக உள்ளனர். கொள்கை முடிவுகளில், சமூக திட்டமிடலில், விழாக் கால ஏற்பாடுகளில்—அவர்களின் தேவைகள் புறக்கணிக்கப்படுகின்றன.

புலம்பெயர்ந்தோர் மற்றும் சர்வதேச மாணவர்களுக்கு, இது குறிப்பாக வேதனைக்குரியது. அவர்களின் சொந்த பண்பாட்டுப் பண்டிகைகள் புதிய நாட்டில் அங்கீகரிக்கப்படாமல் அல்லது கொண்டாடப்படாமல் இருக்கலாம். புதிய நாட்டின் விழாக்கள் அவர்களுக்கு அன்னியமாக உணரலாம்.

பொருளாதாரத் தாக்கம் மிகக் கொடிது. வறுமையின் மறைக்கப்பட்ட செலவுகள் பட்டியலிடக் கடினம்.

மனச்சோர்வு மற்றும் பதட்டம் உடல்நலப் பாதிப்புகளுடன் தொடர்புடையவை. இதய நோய், உயர் இரத்த அழுத்தம், இவை அனைத்தும் வறுமை மற்றும் தனிமையுடன் தொடர்புடையவை.

வறுமையில் வாழும் மக்கள் பெரும்பாலும் தங்கள் உடல்நலச் செலவுகளை நேரடியாக செலுத்துகின்றனர். உலகளவில் ஒவ்வொரு ஆண்டும் 15 கோடி மக்கள் பேரழிவுகரமான உடல்நலச் செலவுகளைக் கொண்டுள்ளனர், இது ஒரு குடும்பத்தின் அடிப்படைத் தேவைகளுக்கு அப்பாற்பட்ட செலவுகளில் 40% க்கும் மேலாக வரையறுக்கப்படுகிறது.

மனநலப் பிரச்சினைகள் வேலை செய்யும் திறனைக் குறைக்கின்றன. மனச்சோர்வால் பாதிக்கப்பட்டவர்கள் அடிக்கடி வேலையைத் தவறவிடுகின்றனர், குறைந்த உற்பத்தித்திறனைக் கொண்டுள்ளனர், மற்றும் வேலை இழக்கும் அபாயம் அதிகம். உலக சுகாதார நிறுவனத்தின்படி, மனநல நிலைமைகள் ஆண்டுக்கு ஒரு டிரில்லியன் அமெரிக்க டாலர் பொருளாதார இழப்புகளை உருவாக்குகின்றன.

வறுமையில் வளரும் குழந்தைகள் அவர்களது வாழ்நாள் முழுவதும் பாதிக்கப்படுகின்றனர். அறிவாற்றல் வளர்ச்சிக் குறைபாடு, கல்விச் சாதனைக் குறைவு, வயதுவந்த மனநல பிரச்சினைகள்—இவை அனைத்தும் குழந்தைப் பருவ வறுமையுடன் தொடர்புடையவை.

வறுமையில் வாழும் பெற்றோர்களின் குழந்தைகள் மன உறுதி நிலைமைகளை உருவாக்க 2 முதல் 3 மடங்கு அதிகம் வாய்ப்புள்ளது.

வறுமை, நிலையற்ற வருமானம் மற்றும் செலவுகளுடன் தொடர்புடையது. மாத இறுதியில் போதுமான பணம் இருக்குமா? உணவு, வாடகை, பயணம் செலுத்த முடியுமா? இந்தத் தொடர்ச்சியான கவலைகள் மன உறுதியைச் சிதைக்கின்றன.

விடுமுறைக் காலங்கள் இந்த நிச்சயமற்ற தன்மையை அதிகரிக்கின்றன. கூடுதல் செலவுகளுக்கான எதிர்பார்ப்புகள், குடும்ப அழுத்தங்கள், சமூக ஒப்பீடுகள்—இவை அனைத்தும் பதட்டத்தை அதிகரிக்கின்றன.

மனிதர்கள் இயற்கையாகவே தங்களை மற்றவர்களுடன் ஒப்பிடுகின்றனர். விடுமுறைக் காலங்களில், சமூக வலைத்தளங்கள் பிரகாசமான கொண்டாட்டங்கள், விலையுயர்ந்த பரிசுகள், கவர்ச்சிகரமான பயணங்கள் நிறைந்திருக்கும். இவற்றை வாங்க முடியாதபோது, மக்கள் தோல்வியுற்றதாக உணர்கின்றனர்.

குறைந்த சமூக நிலை மனநலத்தைப் பாதிக்கிறது. களங்கம், பாகுபாடு, அவமதிப்பு—இவை அனைத்தும் வறுமையுடன் வருகின்றன மற்றும் சுயமரியாதையைச் சிதைக்கின்றன.

செல்வந்தர்கள் மன அழுத்தத்தைச் சமாளிக்க பல வழிகளைக் கொண்டுள்ளனர்: சிகிச்சை, விடுமுறை, பொழுதுபோக்குகள், சமூக நிகழ்வுகள். வறுமையில் வாழ்பவர்களுக்கு, இந்த விருப்பங்கள் கிடைக்கவில்லை. அவர்கள் தங்கள் வலியுடன் தனியாகப் போராடுகின்றனர்.

விடுமுறைக் காலங்களில், இந்தப் பற்றாக்குறை குறிப்பாகக் குறிப்பிடத்தக்கது. மற்றவர்கள் மகிழ்வான குடும்பக் கூட்டங்களைக் கொண்டிருக்கும்போது, வறுமையில் வாழ்பவர்கள் வெற்று அறைகளில், தனிமையின் எதிரொலியுடன் அமர்ந்திருக்கின்றனர்.

விழா நாட்கள் என்பது மனித இணைப்பின் கொண்டாட்டங்கள். ஆனால் கோடிக்கணக்கான மக்களுக்கு, இவை வேதனையான நினைவூட்டல்களாகவே இருக்கின்றன. அவர்கள் எவ்வளவு விலக்கப்பட்டுள்ளனர், எவ்வளவு தனியாக உள்ளனர், எவ்வளவு ஏக்கத்துடன் தங்கள் அன்புக்குரியவர்களுக்காகக் காத்திருக்கிறார்கள் என்பதற்கான நினைவூட்டல்களாக இருக்கின்றன.—இது அடிப்படை மனித கண்ணியத்தின் பிரச்சினை. வறுமை என்பது தனிப்பட்ட தோல்வி அல்ல; இது அமைப்புரீதியான தோல்வி—கண்ணியம் மற்றும் மனித உரிமைகளின் மறுப்பு. ஆனால் அமைப்புகள் மாறும் வரை காத்திருக்க வேண்டிய அவசியமில்லை. ஒவ்வொரு தனிநபரும் செயல்பட முடியும்.

இறுதிச் சிந்தனை

ஒவ்வொரு விழாவிலும், ஒவ்வொரு பண்டிகையிலும், நமது கொண்டாட்ட மேசைகளில் வெற்று நாற்காலிகளை நினைவில் கொள்வோம். அருகிலுள்ள தனிமையான இதயங்களை நோக்கிக் கையை நீட்டுவோம். சிறிய செயல்கள் பெரிய மாற்றங்களை ஏற்படுத்தும்—ஒரு அழைப்பு, ஒரு உணவுப் பகிர்வு, ஒரு மகிழ்வான வரவேற்பு இது போதும்.

வறுமை ஒரு சிக்கலான உலகளாவிய பிரச்சினை, ஆனால் விழாக் காலத் தனிமையைக் குறைப்பது ஒவ்வொரு தனிநபரின் கையில் உள்ளது. நாம் அனைவரும் மனிதக் குடும்பத்தின் பகுதியாக இருக்கிறோம்.

நீங்கள் யாராக இருந்தாலும், எங்கு இருந்தாலும், என்ன செய்தாலும்—இந்த விடுமுறைக் காலத்தில், தனிமையில் உள்ள ஒருவருக்காக ஒரு மாற்றத்தை உருவாக்குங்கள். அது உங்கள் வாழ்க்கையையும் மாற்றும்.

ஏனென்றால், இறுதியில், மனிதத்தன்மை என்பது நாம் எவ்வளவு சம்பாதிக்கிறோம் என்பதால் அளவிடப்படுவதில்லை—நாம் எவ்வளவு கவனிக்கிறோம் என்பதால் அளவிடப்படுகிறது.

குறிப்புகள்

இந்த ஆராய்ச்சிக் கட்டுரை பின்வரும் மூலங்களிலிருந்து தரவுகளை ஒருங்கிணைக்கிறது:

1. University of Oxford – School of Anthropology and Museum Ethnography (2025), “Oxford research explores how poverty and loneliness are linked to pain, fatigue and low mood”
2. Our World in Data – Poverty Statistics (2022-2025)
3. United Nations – International Day for the Eradication of Poverty (2025)
4. Allianz Partners – State of Student Healthcare Report (2024)
5. European Trade Union Confederation – Worker Holiday Poverty Analysis (2022)
6. Migration Policy Institute – Immigrant Loneliness During Holidays (2020)
7. Center for Collegiate Mental Health – International Student Social Isolation Study (2021-22)
8. Kellogg’s UK – Holiday Hunger Report (2016)
9. Child Poverty Action Group (CPAG) – UK Holiday Research (2024)
10. BBC Loneliness Experiment – International Students Analysis (2018)