Home இதழ்கள்இதழ் - 4நல்லாச்சி – 11
This entry is part 10 of 47 in the series நல்லாச்சி

தீபாவளிக்கு ஆரோக்கிய அல்வா வேண்டுமென
அரை மணி நேரமாய்
எசலுகிறான் மாமன்
அசையாமல் அமர்ந்திருக்கிறாள் நல்லாச்சி
எடையும் இடையும் பெருகாமல்
எண்ணெய்யும் நெய்யும் தொடாமல்
நாவினிக்க வேண்டுமாம் தீபாவளி
இத்தனை விதிகளைப் பரப்பினால்
என் செய்வாள் அவளும்

நல்லாச்சியின் பட்டியலை
தலையசைத்து ஒதுக்குகிறான்
பேத்தியின் பட்டியலையோ
கண்டுகொள்ளவேயில்லை
பழைய மனப்பான்மை கொண்ட உங்களுக்கு
நவீன நடைமுறை தெரியாதென
கேலியும் செய்கிறான்

ஆரோக்கிய அல்வா ஒன்றை
ஆன்லைனில் வாங்கியவன்
ஆஹாஹாவெனக் கொண்டாடுகிறான்
அதீத ருசியெனக் கூத்தடிக்கிறான்
மனம் பொறுக்கா ஆச்சியும் பேத்தியும்
கிள்ளியெடுத்துச் சுவைத்தபின்
ஒரு சேர சலித்துக்கொண்டனர்
இந்த உளுந்தங்களிக்கா
இத்தனை ஆர்ப்பாட்டமென
ஜிகினாத்தாள் சுற்றிவரும் புதுமையெலாம்
அன்றைய பழமையாகவும்
இருக்கக்கூடுமென
பாவம்
மாமனுக்குத்தான் தெரியவில்லை.

நல்லாச்சி

நல்லாச்சி -9 நல்லாச்சி – 10

Author

You may also like

Leave a Comment