நல்லாச்சி – 47

This entry is part 47 of 47 in the series நல்லாச்சி

வெறிச்சோடிய முற்றத்தில்
தானியம் கொத்தும் புறாக்களையும்
கசங்கிய வாழையிலைகளையும் பூச்சரங்களையும்
மேயும் மாடுகளையும்
வெறுமையுடன் வேடிக்கை பார்த்தவாறு
அமர்ந்திருக்கிறாள் நல்லாச்சி
திருவிழா முடிந்த திருப்தியுடன்
கலைந்து கிடக்கிறது கோவில்

காட்டுக்குள்ளிருக்கும் குலதெய்வக்கோவிலை
சுற்றிச்சுற்றி வந்து
ரசிக்கிறாள் பேத்தி
மலைகள் சூழ்ந்த அவ்வனாந்திரக்கோவில்
திருவிழாவிற்குப்பின்
தனிமையைப் போர்த்திக்கொள்ளும்போது
தெய்வம் என்ன செய்யும்
அதற்குப் பாதுகாப்பிருக்குமா
விலங்குகள் அச்சுறுத்துமாவென
ஆயிரம் கேள்விகள் குடைகின்றன அவளை

தனிமையை அஞ்சிக்கொண்டிருந்த தெய்வம்
பதிலை எதிர்பார்த்துக் கூர்கிறது
பேச்சுத்துணைக்கும் கதியற்ற கானகத்தில்
கருவறை இருளைக் கிழித்துக்கொண்டு
பீடத்திலிருந்து இறங்கி வந்த அது
கானகத்துத் தனிமையை
விலங்குகளின் நெற்றியில் தீற்றிவிட்டு
பேத்தியின் கொலுசொலியை ஏந்தியபடி
ஊருக்குள் நடக்கத் தொடங்குகிறது
எங்கோ ஒரு எரிநட்சத்திரம்
பொரிந்து வீழ்கிறது
தனிமையை எதிரொலித்தபடி.

நல்லாச்சி

நல்லாச்சி – 46

Author

Related posts

கிறித்துவம் – புதியன புகுதலும் பழையன கழிதலும் பகுதி 1: அத்தியாயம் 3 & 4

இளையவன் சிவா கவிதைகள்

திருவை மு.இரா. மொழிபெயர்ப்புக்கவிதைகள் – 20